2026 оны 10 сарын 28
"Ноорог"-ийг шалгаж буй үндэслэлийг "Үндэсний эв нэгдлийг бусниулах" гэв
"Ноорог креатив студио"-д өнгөрсөн шөнө хойшлуулшгүй ажиллагаа явуулж, ажилчдаас 22-05 цаг хүртэл мэдүүлэг авч ажилчдын утас, хард зэргийг хураан авчээ.
Эх сурвалжийн мэдээлснээр тэднийг Эрүүгийн хуулийн 19.9.1 дүгээр зүйлийн Үндэсний эв нэгдлийг бусниулах заалтаар шалгасан гэв.
Уг хуулийн 19.9.1 дүгээр заалтад:
1.Хүмүүсийг үндэс, угсаа, хэл, арьсны өнгө, шашны номлол, үзэл бодлоор дайсагнуулах, эвдрэлцүүлэх, салан тусгаарлахыг ухуулсан, уриалсан, ялгаварлан гадуурхсан, хүчирхийлсэн, эрхийг нь хязгаарласан, давуу байдал тогтоосон үйлдлийг зохион байгуулсан бол таван жилээс арван хоёр жил хүртэл хугацаагаар хорих ял шийтгэнэ гэжээ.
Хамгийн сүүлд "Ноорог креатив студио" иргэдийн улс төрийн боловсролд хөрөнгө оруулах зорилготой 18 ХОНОГ баримтат киног дуусгаснаа зарлаад байсан юм.
"18 ХОНОГ" баримтат кино нь Монгол Улс УИХ-ын 126 гишүүнтэй болж байгаа анхны сонгууль буюу 2024 оны 6 сарын 10-28 хооронд үргэлжлэх УИХ-ын сонгуулийн сурталчилгааны хоногууд мөн санал өгөх өдрийн бодит үйл явдлыг 5 өөр дүрийн амьдралаар дамжуулан харуулах зорилготой байжээ.
Цагдаагийн ерөнхий газраас прокурорын зөвшөөрөлгүй тул энэ талаар мэдээлэл өгөх боломжгүй гэсэн юм.
