2026 оны 05 сарын 11
Өнгөрсөн бямба гарагт Орос, Украины талууд олзлогдсон цэргүүдээ харилцан солилцох явцад Украины 277 иргэн суллагдсанаас 246 нь цэргийн албан хаагчид байв. Мөн шархадсан 31 хүнийг өөр тохиролцооны хүрээнд суллажээ.
Эх орондоо эргэн ирсэн хүмүүсийн ихэнх нь 2000 оноос хойш төрсөн залуучууд байсан гэдгийг Украины Зохицуулах штаб мэдэгдлээ.
“2022 оны тавдугаар сараас хойш олзонд байсан нэгэн эмэгтэй цэргийн албан хаагч өнөөдөр ойр дотны хүмүүстэйгээ уулзана” гэж тус штабын мэдэгдэлд дурджээ. Энэ удаагийн олзлогдогсод солилцох ажиллагаа нь энэ онд болсон дөрөв дэх, Оросын дайралт эхэлснээс хойших 63 дахь ажиллагаа бөгөөд 2022 оны гуравдугаар сараас хойш Украины 4552 цэргийн албан хаагч олзноос суллагдан эх орондоо эргэн иржээ.
Харин ОХУ-ын Батлан хамгаалах яамны мэдээлснээр, олзлогдогсод солилцох ажиллагааны хүрээнд Оросын цэргийн 261 албан хаагч суллагджээ. Тэднийг “246:246” гэсэн харьцаагаар сулласан бөгөөд тэдэн дээр 15 шархадсан албан хаагч нэмэгдэж байгаа юм. Суллагдсан цэргүүд одоо Беларусьт байгаа бөгөөд удахгүй нөхөн сэргээх эмчилгээ хийлгэхээр эх орондоо ирнэ.
Олзлогдогсод солилцоход Арабын Нэгдсэн Эмират улс зуучилсан байна.
