2025 оны 12 сарын 25
ОХУ-ын Бүгд найрамдах Тува улсын филармонид гоцлол дуучнаар ажилладаг манай улсын иргэн Т.Цэцэндэлгэрийг тагнуулын хэрэгт холбогдуулан баривчилжээ. 31 настай түүнийг Холбооны аюулгүй байдлын албаны харьяа Лефортово дахь цагдан хорих байгууллагад хорьсон байна.
Тува улсын филармонийн гоцлол дуучин Т.Цэцэндэлгэр Москва хотод тагнуул хийсэн хэрэгт сэжиглэгдэн баривчлагдсан гэх мэдээллийг “Mediazona” сайт мэдээлсэн.
Москвагийн Лефортово дүүргийн шүүхээс түүнийг ОХУ-ын Эрүүгийн хуулийн 276 дугаар зүйлд заасан “Төрийн нууцад хамаарах мэдээ баримтыг гадаад улсын тусгай албанд шилжүүлэх зорилгоор цуглуулан хадгалсан хэргийг гадаадын иргэн, харьяалалгүй хүн үйлдсэн” гэх заалтыг үндэслэн хорих шийдвэр гаргасан аж. Уг зүйл заалтад заасан гэмт хэргийг үйлдсэн гэм буруутай нь тогтоогдвол 10-20 жил хүртэлх хугацаагаар хорих ял шийтгэхээр хуульчилжээ. Энэ тухай мэдээллийг тус улсын “Медиазон” цахим хуудсанд нийтэлсэн юм.
Тэрээр өндөр хамгаалалттай Лефортовогийн хорих ангид хоригдож байгаа ч, хэргийн талаар дэлгэрэнгүй мэдээлэл олон нийтэд ил болоогүй байгаа аж. ОХУ-ын хуулиар тагнуулын хэргийг зөвхөн гадаадын иргэдэд хүлээлгэх боломжтой бөгөөд Т.Цэцэндэлгэр Монгол Улсад төрсөн тул Монголын иргэн байх магадлал өндөр байгаа аж.
Тэгвэл манай ГХЯ-ныхан “ОХУ-д байнга оршин суудаг, монголд төрсөн Т.Цэцэндэлгэрийг баривчилсан нь үнэн. Ар гэрийнхэнтэй нь холбоотой байгаа” гэж хэвлэлийнхэнд мэдээлжээ.
