2025 оны 12 сарын 25
УИХ-ын гишүүн Б.Пүрэвдорж Хуурамч шатахууны эсрэг хуулийн төсөл өргөн барихаар болсноо мэдэгдсэн. Түүний хувьд хуурамч шатахуун монголчуудын эрүүл мэнд, агаарын бохирдол, эдийн засагт сөрөг нөлөө үзүүлж байна гэж удаа дараа сануулсаар ирсэн. Б.Пүрэвдорж гишүүний хэлж буйгаар бол Монгол Улсад хуурамч шатахуун үйлдвэрлэдэг бүлэглэл, улс төрийн хамгаалалттай, бизнесийн нөлөөтэй хүмүүсийн бүлэглэл бий болсон бөгөөд шатахууны чанар жил ирэх тусам муудаж, түүнд тавих хяналт суларч байгаа аж.
Иргэдийн зүгээс шатахууны чанар өмнөхөөсөө муудсан талаар сэтгэгдлээ хэлэх нь элбэг. Нийслэлийн Засаг дарга Х.Нямбаатарын хувьд Монгол Улс руу хуучин машин оруулж ирэх асуудалд чанга хандана гэдгээ хэлж, татвар нэмэгдүүлэх асуудлыг Нийслэлийн төсөвт суулгасан. Тэгвэл Б.Пүрэвдорж гишүүний хэлж буйгаар зөвхөн хуучин машинтай тэмцээд зогсохгүй хуурамч шатахууныг илрүүлснээр агаарын бохирдол 30 хувь хүртэл буурна гэдэг судалгаа танилцууллаа. Улаанбаатарын иргэдийг машины утаа, яндангийн утаанаас дутахгүй хордуулсаар байгаа учраас энэхүү хуулийг яаралтай хэлэлцэн батлах ёстой гэж тэр үзэж байна.
