2026 оны 02 сарын 09
Ноорог медиагийн ажилтан А.О-ын төрсөн ах цахим сүлжээгээр мэдээлэл хийсэн. Тус мэдээлэлтэй холбогдуулан НЦУГ-аас мэдээлэл өглөө.
Кибер гэмт хэрэгтэй тэмцэх хэлтсийн дарга С.Тайван: Сүүлийн жилүүдэд цахим мөрийтэй тоглоом зохион байгуулах, тоглуулах, үүний үндсэн дээр иргэдийн амь нас, эрүүл мэнд, сэтгэл санаанд хохирол учруулах гэмт хэрэг жил бүх нэмэгдэж байна. Цагдаагийн байгууллагаас сүүлийн дөрвөн жилд мөрийтэй тоглоом зохион байгуулахтай холбоотой 1360 хэрэг бүртгэлд мөрдөн шалгах ажиллагаа явуулсан. Үүнээс 365 хэрэгт эрүүгийн хэрэг үүсгэж яллагдагчаар татан, Шүүхэд шилжүүлэх саналтай прокурорт хүргүүлсэн бөгөөд 299 хэргийг шүүхээс эцэслэн шийдвэрлүүлээд байна. Энэ төрлийн гэмт хэрэг нь зохион байгуулалттайгаар, олон хүний оролцоотойгоор үйлдэгддэг. Та бүхний мэдэж байгаачлан хар тамхи, эдийн засгийн гэмт хэрэг, хүн худалдаалах гэмт хэргүүд үндэстэн дамнасан, зохион байгуулалттай гэмт хэрэг гэж олон улсад томьёологдон явдаг. Энэ ч үүднээс Монгол Улсын иргэд сүүлийн жилүүдэд гадаад улсаас энэ төрлийн гэмт хэргийг үйлдэх болсон. Тухайлбал, Монгол Улсын иргэн Э-ийн бүлэглэл 35 хүнтэй бүлэглэл бий. Тус бүлэглэл нь гадаад улсаас цахим төрийтэй тоглоомын гэмт хэргийг үйлдэж байхад нь Шувуу ажиллагааны хүрээнд цагдаагийн байгууллагаас албадан баривчилж Монгол Улсад авчирсан. Мөн энэ төрлийн гэмт хэрэг үйлддэг 28 хүний бүрэлдэхүүнтэй Г-ийн бүлэглэлийн хоёр этгээд нь цагдан хоригдож, шалгагдаж байгаа. Мөн Б-ийн бүлэглэл бий. Энэ бүлэглэл нь олон нийтийн сүлжээгээр мэдээлэл хийсэн О.Баяржавхлан гэх хүний хамаарал бүхий 18 хүн оролцсон бүлэглэл. Тус бүлэглэл гадаад улсаас гэмт хэрэг үйлдэж байгаа гэдэг нь өчигдрийн мэдээллээс тогтоогдож байна.
Өчигдөр цахим орчинд мэдээлэл хийсэн иргэний төрсөн дүү болох О, Б нар нь шүүгчийн захирамжаар цагдан хоригдсон. Тус гэмт хэрэг үйлдсэн этгээдүүдийн хувьд мөрийтэй тоглоом зохион байгуулах, гэмт бүлэг үүсгэх, мөнгө угаах зэрэг гурван төрлийн гэмт хэрэгт мөрдөн шалгах ажиллагаа явуулж байна.
Гэмт бүлэг байгуулах гэдэг зүйл анги нь Эрүүгийн хуулийн 3.8.1-р зүйлд "Зохион байгуулалттай гэмт бүлэг гэж гэмт хэрэг байнга үйлдэж, ашиг олох зорилгоор урьдчилан нэгдсэн гурав ба түүнээс дээш хүнтэй тогтвортой нэгдлийг хэлнэ” гэж заасан. Цагдаагийн байгууллага 2023 оноос хой Торгоны зам нэртэй мөрийтэй тоглоомтой холбоотой 10 иргэний 5 данс, Хос тамга нэртэй 11 иргэний 20 дансанд хязгаарлалт тогтоож ажилласан. Тухайн хэрэгтэй холбоотой гурван хүнийг цагдан хорьсон. Тэдгээрийн нэг болох иргэн Б нь 2010-2019 онд цагдаагийн байгууллагад ажиллаж байсан.
