Т.МӨНХСАЙХАН: П.БАТЧУЛУУН ЭМЧ БОЛ МОНГОЛД БЭЛТГЭГДСЭН ХОВОРХОН БОЛОВСОН ХҮЧНИЙ НЭГ

Эрүүл мэндийн сайд Т.Мөнхсайхан тархины үхэлтэй донороос эд эс, эрхтэн шилжүүлэн суулгах мэс засал хийхэд тулгамдаж буй асуудал болон П.Батчулуун эмчтэй холбоотой хэргийн талаар мэдээлэл өглөө. 

Т.Мөнхсайхан: Манай улс эмч, эмнэлгийн ажилчид ажил үүргээ гүйцэтгэж, ард иргэдэд тусламж үйлчилгээ хүргэснийхээ хариуд эрүүгийн хариуцлага, ял шийтгэл хүлээдэг дэлхий дээрх цөөхөн улсын нэг болчхоод байна. Бид эмч, эмнэлгийн мэргэжилтнийхээ эрх зүйн байдлыг сайжруулах тал дээр суурь өөрчлөлтүүдийг хийх хэрэгтэй.

Олон нийтэд мэдэгдэж байгаа ганц нь П.Батчулуун эмчийн тохиолдол. 2023, 2024 онд нийт 20 орчим эмч ажил үүрээ гүйцэтгэж яваад ял шийтгэл хүлээсэн. Миний бие УИХ-ын гишүүн, Эрүүл мэндийн сайд болсноосоо хойш эмч, эмнэлгийн ажилчдын эрх зүйн байдлын хууль дээр анхаарал хандуулж, уг хуулиа санаачлаад үзэл баримтлалыг нь бий болгоод явж байна. Ирэх дөрөвдүгээр сард багтаад Засгийн газарт танилцуулна. Энэ жилдээ багтаж УИХ-ын чуулганд өргөн барих төлөвлөгөөтэй ажиллаж байна.

Би шүүх хурал болохоос өмнө хоёр, гурван удаа Батчулуун эмчтэй уулзсан. Шүүх хурлын процесс ямар шатандаа явж байгаа, ЭМЯ-ны зүгээс ямар дэмжлэг хэрэгтэй болон юу хийх шаардлагатай талаар тодруулж П.Батчулуун эмчтэй уулзсан. Анхан шатны шүүх хурлаар ял оноосны дараа би өөрийнхөө байр суурийг илэрхийлсэн. Давж заалдах шатны шүүх Анхан шатны шүүхийн шийдвэрийг хэвээр үлдээсэн. Одоо өмгөөлөгчдийн хувьд дээд шатны шүүхэд хандах бодолтой байгаа юм билээ. Тэгэхээр шүүхийн гаргаж байгаа шийдвэр дээр бид нар ямар нэгэн зөв буруу гэсэн дүгнэлт өгөх нь тохиромжгүй. П.Батчулуун эмч ял шийтгэл хүлээсэн тохиолдолд тархины үхэлтэй донороос эд эс, эрхтэн шилжүүлэн суулгах мэс засал цааш үргэлжлэхэд хүндрэлтэй болно. П.Батчулуун эмч бол Монгол Улсад бэлтгэгдсэн ховорхон боловсон хүчний нэг.